春节假期回顾

“悟空~”

“师父?”

“26,27,28,29,30,……”

“啊~~啊~~师父,不要再念啦~~啊~~~”(剧痛捂头中)

后面再继续讲上面嘅。

从年廿九开始,基本上每日都喺出边食,除咗年初二喺屋企自己开年。食嚟食去都係沙溪果边多,同一间酒楼,剩係房唔同,餸都一样,连续几日食到我冇晒食欲。佢哋千叮万嘱早啲过去,入到去佢哋竟然喺到卡拉ok,震耳欲聋,真係上当受骗。

亲戚围住密密斟,讲话表弟喺学校揾咗个女仔,係湛江妹,佢阿妈好不满,“做乜揾个乡下妹!”表弟话:“车,舅父未又係揾个捞妹!”(我笑到晕)继续:“广州妹又懒又贪靓,养唔熟!”(我笑死了)再继续:“个人不知几纯品,仲识煮饭俾我食!”哈哈,结果激到佢阿妈死死下,学校放假仲带女友返别墅住,阿妈唔俾,结果嗌晒交。

表弟今年年中先高职毕业,不过已经自己揸一部40几万嘅四驱车。佢哋屋企个用嚟卡拉ok嘅无线mic坏咗,佢就即刻揸车出去买咗个10蚊嘅辣鸡返嚟自己焊——当然,最尾都整唔好。我唔知依件事係说明佢太容易使钱定係说明佢唔会大手大脚。

初三又係过去果头,喺酒楼房间食饭果时被逼轮住上台揸mic表决心,表决心几时摆酒。非常无奈之后,我决定以后逢年过节都係出去旅游算了,依啲问题,我谂都未谂过。

之后去咗珠江半岛拜年,睇咗万几一方嘅望江豪宅,太劲了个江景。虽然表弟佢哋闲置喺东海嘅屋都係望江,不过珠江半岛依到係主航道,望晒二沙岛,望到一半星海音乐厅同一半海印桥,仲近住好靓好靓嘅中大北门。彩灯轮船巡游同珠江夜游都望到晒,旁边仲係乜嘢俱乐部,成日有人划艇同扯风帆。最中意就係楼下果条江边小径,朝早用嚟晨练小跑简直正到痹。亲戚个女。。。一开始望仲以为係仔,cool到,周笔畅都要企埋一边。之后喺金满城食,真係好耐冇喺市内食粤菜了,前几日都係食番禺果头嘅,食返市内嘅嘢感觉真係update好多。同时见到一垢云博士,80年代末珠江电台嘅一个节目主持人,算係我小小疏嘅亲戚。细个听一垢云博士依个节目果时唔知係亲戚,后尾去饮果时先听讲。距离上次去饮果时远远望过,今次见已经十几年之后了。

几日之中老窦老母都去同咗好多以前嘅朋友饮茶,每次返嚟就同我讲,边个边个嘅仔女依家做乜嘢乜嘢高职,攞几高几高人工,真係有出息,佢哋父母点样点样安乐了,或者边个边个嘅仔女做咗几年乜嘢高职,仲要强调迟我几多几多年毕业嘅,依家又读乜嘢乜嘢MBA,几个月之后又去Hongkong读,然后又继续去UK读,返嚟就点样点样有钱途,点样点样高职,攞几多几多人工。。。每次总结一句:同佢哋依一脱人嘅仔女都好有出息,至于我,后面就省略了。

终于可以喺屋企坐低食饭,阿妈就开声:“明年就26,好快就27,28,容乜意就30,你要生性啦。。。”(后面参照上面嘅内容省略一千字)

放假真係放到我完全回归晒自我,无拘无束,晚晚夜一夜瞓觉,朝朝迟一迟起身,听歌就听歌,睇电视就睇电视,唔shave就唔shave,真係对听日返工好有恐惧感,又要面对工作,面对择业,面对增值,面对摆酒~

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s